O partido Antela-Loñoá, suspendido por causa do temporal o pasado domingo, disputarase finalmente o xoves 17 de abril, Xoves Santo, entre as xornadas 30ª (o Antela visita Viana) e 31ª (o Antela recibe ao Muíños).
O Comité de Competición da Federación Galega de Fútbol emitiu este mércores un comunicado no que indica: “habiendo transcurrido el plazo conferido a los efectos sin verificarse en un gran número de partidos acuerdo entre los requeridos, y conforme al acuerdo de este mismo órgano competicional de fecha 25 de enero de 2025 al respecto, por el cual la fecha de celebración de los partidos suspendidos sería fijada por este Comité de Competición, de no existir mutuo acuerdo entre los clubes contendientes, y examinados los distintos calendarios de las competiciones de liga (…) resuelve fijar el jueves 17 de abril de 2025 (festivo) como fecha de celebración de los partidos suspendidos en Preferente Futgal Aficionados y Primeira Futgal Aficionados”.
É dicir, ademais do Antela-Loñoá, nesa data xogaranse o Viana-Celanova, o Maceda-Cartelle, o Allariz-Melias e o Peroxa-Córgomo correspondentes á 19ª xornada e aprazados esta pasada fin de semana. Dada a altura de competición, con apenas catro xornadas para o remate da Liga, a 19ª celebrarase nun momento decisivo do campionato. En calquera caso, o Antela evita o que até onte parecía unha posibilidade certa: ter que disputar o partido en Martes de Entroido, o primeiro festivo en moitas localidades de Ourense antes da Semana Santa.