As Ligas pérdense nos oito primeiros partidos, sostén Pep Guardiola. Probablemente o Nogueira -un equipo tan bo como o Antela, o Velle, o Celanova ou o Córgomo- estea pagando o seu mal arranque. O 27 de outubro, a finais do segundo mes de competición, gañou ao Viana, pero era só a súa segunda vitoria, e navegaba xa a 13 puntos do líder, o Antela.
No comezo do sexto mes de competición, o Antela segue líder e suma 15 puntos máis co Nogueira cun partido menos. O Nogueira chega ao partido desta tarde na Tella (16,30 horas) despois de tres derrotas e un empate: dúas derrotas e un empate en xaneiro, fronte a un Antela que sumou un triunfo (en Allariz), perdeu despois en Maside e viu aprazado o encontro co Loñoá o domingo pasado.
Despois de ceder so 7 puntos na primeira volta, os de Bruno Gómez inda non sumaron na segunda volta, mais seguen a 41 puntos do seu obxectivo. Nada mudou malia derrota en Maside. “O equipo está moi tranquilo”, afirmou esta semana o adestrador, que perde a Peque e a Joni por lesión e elaborou unha convocatoria provisional con 20 futbolistas -na que volve incluír ao xuvenil Izan- ante a posibilidade dalgunha baixa de última hora.
BRUNO E ÓLIVER NA TELLA
Bruno regresa á Tella, onde liderou o equipo no campo e no banquiño, na mellor etapa do club -cinco tempadas en Preferente nas últimas dez-. Regresa con Óliver, que foi clave no Nogueira dos últimos anos, subcampión de Primeira na Liga 23/24-. Regresa cun Antela que, malia o tropezo en Maside, a enfermidade de Xabi Lamas e a interrupción da semana pasada, domina o campionato con puño de ferro, gañando partidos moi complicados en Melias, en Celanova, en Cartelle, en Muíños e blindando o feudo da Moreira.
O equipo está tranquilo e con gañas de sacudirse o malestar destas dúas semanas de chuvia e frío. Co vento nas velas dunha canteira que está a se desempeñar moi por riba das expectativas tanto en Segunda Futgal como en Primeira Futgal xuvenil. Mentres, no primeiro equipo futbolistas como Cole, Antón ou Jorge consolídanse no grupo.
O Antela afronta este próximo mes e medio a ruta de maior dificultade, xogará consecutivamente contra o Nogueira, o Melias, o Velle, o Carballiño, o Polígono e o Celanova -todos entre os dez primeiros, situados a unha distancia entre os 8 puntos, o Celanova, e os 17, o Melias-. Se repite a serie da primeira volta (seis triunfos) chegará á fase decisiva do campionato, as últimas oito xornadas nas que se xogan as Ligas, segundo sostiña Luis Aragonés, con todo (case) feito.
Convocatoria
