LEMOS, 1; ANTELA, 0.
◾ Comentario. Unha xogada de estratexia, un remate de Youness Benhlal na área pequena despois de empurrar en Boán para recoller un centro lateral a saque de falta e quedarse só diante de Bruno, acabou coa resistencia do Antela en Monforte (1-0). Noutro partido disputado nun campo pesado pola constante chuvia, o rival aproveitou unha acción a balón parado no minuto 5 para derrubar o muro defensivo limiano (esta tarde con Boán e Puchocomo centrais), e con iso foi suficiente. Bruno Gómez utilizou o once canon deste primeiro terzo da Liga, con Carlos, Negrete e Charli na avanzada, e superada a hora de partido deu entrada a Aragón -o colombiano que inda non sabe o que é xogar cun campo seco- e despois a Dinís e Jorge. Toda a pólvora que tiña no banquiño. O Antela cae á sétima praza e xogará a semana próxima na Moreira diante do Valadares para pechar un mes de novembro no que, de momento, suma 4 dos 12 puntos que disputou.
ANTELA B, 0; Brollón, 1.
◾ Comentario: O Antela B perdeu na casa contra o C.D. Brollón (0-1) despois de encaixar un gol de penalti aos 11 minutos de partido e non ser quen de equilibrar o xogo durante toda a primeira parte, na que os visitantes foron superiores e gozaron das mellores ocasións de gol (una delas frustrada por unha boa intervención de Lulo). Foron titulares, ademais de Lulo, os xuvenís David Rivero e Lucas Blanco. Tamén Aarón Blanco, que regresaba dunha lesión, e Izan, como dianteiro xunto a Joni. Mais o fútbol directo do Antela B non levou perigo á area lucense. Á volta do descanso, Amine e Carrasco apareceron para dirixir ao equipo, que aproveitou o repregue do Brollón para baixar o balón e construír a ofensiva. Joni foi a punta de lanza dun ataque ben abastecido desde o mediocampo e o filial tivo oportunidades para alcanzar o empate en accións de Xurxo, Joni, Carrasco, Raúl, Anxo e Izan… media ducia das máis claras. No tramo final o Antela B intensificou a ofensiva coa entrada de Anxo, David Lamas e Raúl, e o Brollón gastou as súas últimas forzas en se defender. Desta non houbo empate agónico (como nos choques co Nogueira, o Purísima ou o Polígono) e o filial segue sen poder sumar a primeira vitoria do curso como local.
Xuvenís: ANTELA, 1 (Anxo); Barbadás, 3 (Denís).
◾ Comentario. Os limianos ven distanciarse ao seu rival desta mañá na loita polas prazas de promoción de ascenso despois de caer no Fernández Carrera nun partido que estivo marcado polos dous goles dos visitantes xusto ao inicio da segunda metade. Marcou Denís para o Barbadás no 46 e no 51 para lle dar a volta ao resultado tralo gol de Anxo Calleja na primeira parte. O Antela, malia o regreso de Carnero e Carlos Pires, non puido contrarrestar ese duplo golpe dos ourensanos e encaixou o último xa contra o final, tamén obra de Denís, que sae de Xinzo cun hat-trick e un botín de 3 puntos para o Barbadás.