Grandes momentos do 2025: 3º A Preferente 336 días despois

O Antela dominou o campionato de Primeira Futgal do principio ao fin e acadou o ascenso en abril, antes de que se cumplira o ano do descenso da tempada anterior, cun espléndido final de Liga cheo de bo fútbol e goleadas.

Na previa do xogo do 20 de abril advertíase:

“336 días despois daquela derrota na Moreira diante do Choco que precipitou o descenso a Primeira, o Antela pode recuperar mañá (17,00 horas) no mesmo escenario e diante do Muíños unha praza na segunda categoría do fútbol galego. Chega o equipo de Bruno Gómez na mellor dinámica da tempada: doce partidos sen perder, sete sen encaixar, cunha media goleadora de 2,2 tantos por partido e unha vantaxe tranquilizadora: dez puntos sobre o Celanova e once sobre o Polígono.”

O equipo goleou ao Muíños (4-0), con tantos de Xabi, Pedro, Anxo e Dinís.

“O Antela dominou o choque como a Liga, de principio a fin. E a xente gozou como leva gozando o último mes. Xabi Lamas e Breixo pecharon as portas no medio campo e estiveron áxiles para iniciar a ofensiva. Arriba, os lobos morderon constantemente á defensa visitante, que pasou a tarde ao borde dun ataque de nervios. Suso, tan grande como nas súas mellores tardes na Moreira, detivo un tras outro a chuvia de disparos, e onde non alcanzou apareceron os paus.”

E despois da festa na Moreira, chegou o momento de valorar o logro. Aquí constatamos: O Antela regresa a Preferente cun proxecto máis sólido e ambicioso.

“Pasou un ano por futbolistas da casa que hoxe son xa xogadores maduros e están máis comprometidos cun modelo de club. O fútbol limiano, esa “veta” que busca a afección, quere existir, revelarse. Ese potencial é o alento para encarar o futuro.

O cadro de futbolistas e o cadro técnico demostraron durante estes nove meses de competición que saben convivir coa presión da máxima esixencia. Todos e cada un creceron deportivamente durante o proceso. E o equipo acabou despregando sobre o campo o seu mellor fútbol para gañar o sexto título na Liga provincial (o segundo en catro anos).”