A penúltima cita da Liga regular na Moreira, esta tarde (17.30 horas) contra o Moaña, ofrece ao Antela de Bruno Gómez a posibilidade de dar un paso definitivo cara os play-off. Se o Antela gaña na casa –onde suma dous goles por partido e encaixa un gol cada 225 minutos de media– a distancia co Arnoia e co Cultural Areas empezará a ser un mundo, e reducirá inda máis as posibilidades de caza do Porriño e do Lemos.
É unha conta sensata, porque independentemente do que fagan os demais, o Antela é forte na Moreira e o club fixo un chamamento ás entidades deportivas locais na procura da mellor asistencia da tempada nun partido que se considera clave. Ademais, volven Brais Outeiriño e Carlos González para reforzar o ataque, e Xabi Lamas e Cole van recuperando o ritmo dos lobos despois das súas lesións.
O Moaña, en calquera caso, non será un rival cómodo. Con 32 puntos, aínda non ten a permanencia asegurada. Hai un mes parecía outra cousa. Despois de gañar ao Atios (1-0), daquela líder, empatou no campo do Areas cun tanto no desconto. Mais a semana seguinte tivo que suar para empatar diante do Umia, último, e despois caeu en Portonovo e na casa diante do Alertanavia.
A previsión de chuvia, que pode alterar as condicións do partido, é outra das ameazas para un Antela -agora si, despois do triunfo en Valadares- centrado no obxectivo extra da campaña: o play-off polo ascenso.
Así está a cousa (puntuacións e rivais) a catro xornadas do final (o campión ascende, os catro seguintes até o quinto xogan os play-off):
| Rival de hoxe | Xornada 32 | Xornada 33 | Xornada 34 | |||
| 1 | Pontevedra B | 63 | Porriño* | VILALONGA | Arnoia | LEMOS |
| 2 | Atios | 56 | Choco | PORTONOVO | PORRIÑO | Alertanavia |
| 3 | Antela | 55 | Moaña | CULTURAL | Umia | PORTONOVO |
| 4 | Portonovo | 55 | Umia | Atios | ALERTANAVIA | Antela |
| 5 | Porriño | 51 | PONTEVEDRA | Choco | Atios | VILALONGA |
| 6 | Lemos | 51 | CELANOVA | Cented | TYDE | Pontevedra |
| 7 | Arnoia | 49 | CENTED | Tyde | PONTEVEDRA | Choco |
| 8 | Cultural Areas | 48 | ALERTANAVIA | Antela | BELUSO | Celanova |
A BASE
O xuvenil saíu goleado onte da súa visita ao Santa Mariña en Vigo (5-0). Todos os tantos chegaron na primeira metade na maior goleada encaixada na Liga (a anterior era o 4-0 no Pabellón). Foi ademais o sexto partido da Liga no que o xuvenil non conseguiu marcar. O equipo visitará Gondomar a próxima fin de semana, xogará despois na casa co Rápido de Bouzas e despedirá a tempada en Coruxo, cumprindo o obxectivo da permanencia.
