Un gol de Carlos González no lanzamento dunha falta na frontal que se colou entre a barreira e o porteiro valeu ao Antela para sumar unha nova vitoria na Moreira (1-0 ante o Vilalonga) e ascender até a 3ª praza da clasificación, con opcións claras de alcanzar os play-off de ascenso. Non cede o equipo de Bruno, que chega aos 49 puntos rentabilizando como ningún outro os seus 36 goles (hai dez equipos mellores neste apartado, pero só dous que encaixan menos). A próxima semana o Antela xogará na Queixeira diante do Arnoia, un derbi que chega nun bo momento para ambos clubs, cumpridos os obxectivos de inicio de tempada.
O FILIAL SORPRENDE AO POLÍGONO
Os goles de Joni e Codes mediada a segunda parte serviron ao Antela B para sumar o seu terceiro triunfo na Liga. Foi no campo do Polígono, con Lulo, Carrasco e Xurxo de novo titulares, e Codes desde o inicio. O Antela alcanza os 17 puntos, pero segue colista a 10 da teórica última praza de permanencia (agora ocupada polo Maceda). Restan sete partidos.
O XUVENIL CAE EN VIGO
O xuvenil estivo a piques de dar a sorpresa no campo do Alertanavia. Carlos Pires (no minuto 22) e Lucas Carnero (no 52) puxeron por diante ao equipo que hoxe dirixiu Xurxo Santana. Mais os locales equilibraron rápido o marcado e resolveron no minuto 75 cun tanto de penalti. Malia a derrota (3-2), o Antela continúa 7º na táboa antes de recibir ao Valadares a próxima fin de semana en Xinzo.
