O Antela xuvenil sumou a súa segunda vitoria na Liga (1-0 contra o Pabellón B con gol de Anxo Calleja) e confirma o seu bo arranque de campionato nun partido serio e completo dos de Forri. Fabián aséntase como titular no medio con outro gran despregue e Lucas Blanco ratifica as magníficas sensacións do debut. Anxo, no seu papel de líder e goleador. Forri xa ten os roles moi definidos e iso axuda á solidez do equipo.
Resultados e clasificacións: AQUÍ.
O Antela de Bruno Gómez xogou de cara contra o Atios (0-0) e sumou un punto no debut de Couto e Negrete, que aumenta a confianza do equipo neste arranque de Liga. Partido con boa entrada na Moreira que será de novo o escenario do choque do próximo domingo (día da Saínza) contra o Beluso.
Couto aliñouse como central e Pucho foi desprazado ao lateral nunha defensa que mudou pola baixa de Tiago. No centro do campo, Peruzzo, Kandeh e Xabi Lamas (o novo capitán) empezan a tempada a gran nivel, mentres que adiante o adestrador elixiu hoxe aos dous Carlos e ao colombiano Negrete, que deron batalla malia a ausencia de goles.
O Antela é décimo terceiro con dous puntos nunha clasificación que lidera o Valadares, con seis, único equipo capaz de gañar os dous primeiros choques.
Resultados e clasificación: AQUÍ.
O Antela B foi superior ao Allariz durante toda a primeira parte e nos vinte minutos finais do partido, mais volveu agasallar ao rival cun gol ao inicio de segunda parte que igualou o marcador (1-1, que sería o resultado final). Adiantáranse os limianos cun tanto de David Lamas que resolveu un bo pase de Álex Teixeira cun globo sobre o meta local. O tanto, no minuto 33, refrendaba o bo partido do filial, mellor asentado no campo e dominador do balón. Tivo ocasións o Antela para sentenciar o choque.
Xusto tras o descanso, un erro na defensa dunha falta lateral permitiu que o Allariz empatase, e pasase a controlar o xogo cun gran despregue de Iker Rodríguez. O Antela perdeu o sitio e a calma, e pasouno mal durante uns minutos. Cando se recompuxo, volveu ameaza a meta de Miranda, pero Joni mandou fóra o balón nun man a man co porteiro local. Desta volta os cambios non reactivaron o equipo como a semana anterior na Moreira, mais o Antela puido volver a marcar nun disparo de Amine desde lonxe.
O filial puxo o teito moi alto diante do Nogueira, e empatou. Hoxe, nun partido menos inspirado, non perdeu. Hai equipo. Debutaron Pío e Álex Teixeira e Felipe volveu ser titular pola esquerda, e Lamas continúa inspirado.
Ficha técnica: AQUÍ.
Con goles de Álvaro no seu debut e David, ambos na primeira metade, o Antela Xuvenil gañou en Monforte na estrea na Preferente Futgal un partido que se complicou na segunda metade, cando os locais dominaron o xogo a base de impoñer o seu físico e recortaron moi cedo a vantaxe dos limianos.
Se na primeira parte o Antela despregou o mellor fútbol con Anxo Calleja liderando a ofensiva ben acompañado por Joga e cun escudo no medio campo (Bechiki e Fabián); na segunda Calleja viuse obrigado a pelexar só contra a defensa contraria cos seus botados atrás, mais sempre ordenados baixo a dirección de David e Lucas Carnero.
Os debutantes pasaron o exame con nota, e con mención especial para Blanco (rapidisimo), Bechiki (un diamante), Joga (extremo con clase e disposición ao traballo) e Álvaro (polo gol).
A próxima semana o Antela Xuvenil recibirá ao Pabellón B.
Resultados e clasificación: AQUÍ.